अहिल्यानगर जिल्हा प्रतिनिधी प्रतिनिधी :*अशोक सूर्यवंशी यांच्याकडून सविस्तर वृत्त असे की
अहिल्यानगर : शिक्षण क्षेत्रात आपल्या कार्याने विद्यार्थ्यांमध्ये ज्ञान, संस्कार आणि सामाजिक जाणीव रुजविणारे आदर्श शिक्षक अविनाश साठे सर यांनी नुकतीच देशाच्या सर्वोच्च लोकशाही मंदिराची अर्थात नवीन संसद भवनाची भेट घेतली. या संस्मरणीय भेटीनंतर त्यांनी व्यक्त केलेले मनोगत प्रेरणादायी आणि प्रत्येक नागरिकाला लोकशाहीबद्दल अभिमान वाटावा असे आहे.
संसद भवनात प्रवेश करताच त्याच्या भव्य वास्तुकलेने, आधुनिक सुविधांनी आणि शिस्तबद्ध वातावरणाने आपण भारावून गेल्याचे साठे सर यांनी सांगितले. भारताच्या लोकशाही व्यवस्थेचे केंद्रस्थान प्रत्यक्ष पाहण्याची संधी मिळाल्याने मनात अभिमानाची आणि कृतज्ञतेची भावना निर्माण झाल्याचे त्यांनी नमूद केले.
भेटीदरम्यान लोकप्रतिनिधी देशाच्या विविध प्रश्नांवर चर्चा करून जनतेच्या हिताचे निर्णय कसे घेतात, याची माहिती मिळाली. लोकशाही प्रक्रियेतील संसद भवनाची भूमिका किती महत्त्वाची आहे, याची प्रचिती या भेटीतून आली. नवीन संसद भवनामध्ये लोकसभेच्या सुमारे ८८८ सदस्यांसाठी, राज्यसभेच्या ३८४ सदस्यांसाठी आसन व्यवस्था असून संयुक्त अधिवेशनासाठी १२७२ सदस्यांची क्षमता आहे. लोकसभेच्या सभागृहात भारताचा राष्ट्रीय पक्षी मोर, तर राज्यसभेच्या सभागृहात राष्ट्रीय फूल कमळ या संकल्पनांवर आधारित आकर्षक सजावट करण्यात आली आहे.
अविनाश साठे सर म्हणाले की, “संसद भवनाची भेट ही केवळ वास्तू पाहण्यापुरती मर्यादित नसून ती भारतीय संविधान, लोकशाही मूल्ये आणि नागरिकांच्या कर्तव्यांची जाणीव करून देणारी एक सजीव शाळा आहे. देशाच्या प्रगतीसाठी प्रत्येक नागरिकाने जागरूक, जबाबदार आणि सक्रिय राहणे आवश्यक आहे, हा महत्त्वपूर्ण संदेश मला या भेटीतून मिळाला.”
शिक्षक म्हणून विद्यार्थ्यांमध्ये संविधानाविषयी आदर, राष्ट्रप्रेम आणि लोकशाही मूल्यांची जपणूक करण्याची प्रेरणा या भेटीतून अधिक दृढ झाल्याचे त्यांनी सांगितले. संसद भवनातील प्रत्येक दालन, प्रत्येक सभागृह आणि तेथील ऐतिहासिक वारसा हा भारतीय लोकशाहीच्या सामर्थ्याची साक्ष देणारा असल्याचेही त्यांनी नमूद केले.
संसद भवन भेटीचा हा अनुभव त्यांच्या आयुष्यातील अविस्मरणीय ठेवा ठरणार असून विद्यार्थ्यांना आणि समाजाला देशसेवेची प्रेरणा देणारा संदेश सतत देत राहील, असा विश्वास त्यांनी व्यक्त केला.
“लोकशाहीचे हे पवित्र मंदिर पाहण्याचे भाग्य लाभणे ही माझ्यासाठी अभिमानाची बाब असून हा अनुभव आयुष्यभर स्मरणात राहील,” अशा शब्दांत अविनाश साठे सर यांनी आपल्या भावना व्यक्त केल्या.
